Flag

An official website of the United States government

1 MINUTE READ
February 7, 2024

ທ່ານນາງ ແຮັດເຕີ ວາເຣຍອາວາ, ເອກອັກຄະລັດຖະທູດ ສ. ອາເມລິກາ ປະຈຳ ສປປ ລາວ

ແຮັດເຕີ ວາເຣຍອາວາ ໄດ້ສາບານຕົນໃນການມາປະຈຳການເປັນເອກອັກຄະລັດຖະທູດ ສ. ອາເມລິກາ ປະຈຳ ສປປ ລາວ ໃນວັນທີ 19 ມັງກອນ 2024 ທີ່ຜ່ານມາ.  ເພິ່ນເປັນສະມາຊິກອາວຸໂສໃນສາຍອາຊີບນັກການທູດ ຄືລຳດັບຊັ້ນ ທີ່ປຶກສາ.  ໄລຍະຜ່ານມາ, ເພິ່ນເຄີຍເປັນຮອງທູດ ແລະ ອຸປະທູດ ປະຈຳການຢູ່ ສະຖານທູດ ສ. ອາເມລິກາ ທີ່ກຸງມານິລາ (Manila), ປະເທດຟີລິບປິນ.  ນອກນັ້ນ ຍັງເຄີຍເປັນ ຮອງທູດ ແລະ ອຸປະທູດ ປະຈໍາຢູ່ ປະເທດອິນໂດເນເຊຍ, ແລະ ຫົວໜ້າກົງສຸນໃຫຍ່ ປະຈຳຢູ່ ສຸຣາບາຢາ (Surabaya), ປະເທດອິນໂດເນເຊຍ.

ຢູ່ວໍຊິງຕັນ, ທ່ານເອກອັກຄະລັດຖະທູດ ວາເຣຍອາວາ ເຄີຍເປັນຫົວໜ້າຫ້ອງການຂອງປະເທດ ເນປານ (Nepal), ສີລັງກາ (Sri Lanka) , ບັງກາລາເທດ (Bangladesh), ເມົາດິຟ (Maldives) ແລະ ບູຖານ (Bhutan) ຂອງພາກພື້ນອາຊີໃຕ້ ແລະ ກາງ ຂອງກະຊວງການຕ່າງປະເທດ ສ. ອາເມລິກາ; ນອກນັ້ນ ເພິ່ນຍັງເຄີຍປະຈຳການຢູ່ສູນປະຕິບັດງານຂອງກະຊວງການຕ່າງປະເທດ ແລະ ເປັນເຈົ້າໜ້າທີ່ຮັບຜິດຊອບວຽກງານປະເທດໄທ ຂອງພາກພື້ນອາຊີຕາເວັນອອກ ແລະ ປາຊີຟິກ.  ເພິ່ນໄດ້ເຂົ້າເປັນສະມາຊິກການທູດ ນັບຕັ້ງແຕ່ປີ 1996, ທ່ານເອກອັກຄະລັດຖະທູດ ວາເຣຍອາວາ ຍັງເຄີຍປະຈຳການຢູ່ຕ່າງປະເທດຄື: ປະເທດອິນເດຍ, ມໍຣິຕິສ (Mauritius), ສສ ຫວຽດນາມ, ແລະ ບັງກາລາເທດ (Bangladesh).

ກ່ອນທີ່ຈະເຂົ້າເປັນນັກການທູດ, ທ່ານເອກອັກຄະລັດຖະທູດ ວາເຣຍອາວາ ເຄີຍເປັນນັກຂ່າວໜັງສືພິມ ຢູ່ ວໍເຕີວິວ, ເມນ (Waterville, Maine), ເຕີບໃຫຍ່ຢູ່ ເມືອງ ຊີດາ ຣາປິດ, ລັດ ໄອໂອວາ (Cedar Rapids, Iowa), ທ່ານເອກອັກຄະລັດຖະທູດ ວາເຣຍອາວາ ສໍາເລັດການສຶກສາລະດັບປະລິນຍາຕີ ສາຂາພົວພັນຕ່າງປະເທດຈາກມະຫາວິທະຍາໄລນັກການທູດ ຈອຈ໌ທາວ (Georgetown University’s School of Foreign Service). ປະລິນຍາໂທຈາກມະຫາວິທະຍາໄລ ມິຊຸຣີ (University of Missouri) ແລະ ຈາກມະຫາວິທະຍາໄລ ຊູແຊັກ ຂອງສະຫະລາຊະນາຈັກອັງກິດ (University of Sussex in the United Kingdom).  ໃນປີ 2012, ທ່ານເອກອັກຄະລັດຖະທູດ ວາເຣຍອາວາ ໄດ້ສຳເລັດການສຶກສາຂັ້ນປະລິນຍາໂທ ຂະແໜງຍຸດທະສາດດ້ານຄວາມໝັ້ນຄົງແຫ່ງຊາດ ຈາກວິທະຍາໄລສຶກສາການສົງຄາມແຫ່ງຊາດ (National War College) ທີ່ ວໍຊິງຕັນ ດີຊີ, ແລະ ໃນປີ 2014 ເພິ່ນສໍາເລັດການຝຶກອົບຮົມດ້ານການເປັນຜູ້ນໍາ ກັບກອງປະຊຸມແມ່ຍິງສາກົນ (International Women’s Forum – IWF).  ເພິ່ນໄດ້ຮັບລາງວັນກຽດຕິຍົດຈໍານວນຫລວງຫລາຍ, ລວມທັງລາງວັນ/ຫລຽນປະດັບຈາກປະທານາທິບໍດີ.  ເພິ່ນສາມາດປາກພາສາອິນໂດເນເຊຍ ແລະ ຍັງໄດ້ສຶກສາພາສາຫວຽດນາມ, ພາສາຝຣັ່ງ, ແລະ ພາສາເຢຍລະມັນ.  ທ່ານເອກອັກຄະລັດຖະທູດ ວາເຣຍອາວາ ແຕ່ງງານກັບ ທ່ານ ບິລລີ້ ວາເຣຍອາວາ ແລະ ມີລູກຊາຍນຳກັນສອງຄົນ.