ທີ່ນະຄອນຫລວງວຽງຈັນ, ສປປ ລາວ – ກ່ອນອື່ນ ພວກຂ້າພະເຈົ້າຂໍສະແດງຄວາມຂອບໃຈມາຍັງກະຊວງການຕ່າງປະເທດ ທີ່ໄດ້ອຳນວຍຄວາມສະດວກໃນການເຂົ້າຮ່ວມຂອງສື່ມວນຊົນໃນມື້ນີ້, ແລະ ພວກຂ້າພະເຈົ້າກໍ່ຂໍຂອບໃຈບັນດາຜູ້ຕາງໜ້າຈາກສຳນັກງານຂ່າວສານຕ່າງທີ່ໄດ້ມາເຕົ້າໂຮມກັນໃນມື້ນີ້.
ໃນອາທິດທີ່ຜ່ານມາ, ຜູ້ຕາງໜ້າຈາກສະຖານທູດຣັດເຊຍ ໄດ້ເຮັດໃຫ້ປະຊາຊົນລາວຕົກຢູ່ໃນກະແສຖືກຕົວະຍົວະຫລອກຫລວງ ແລະ ມີການບິດເບືອນຂໍ້ມູນກ່ຽວກັບການຮຸກຮານທີ່ຜິດກົດໝາຍຕໍ່ປະເທດອູແກຣນ.
ໃນມື້ນິ້, ສະຖານທູດສະຫະລັດອາເມລິກາ ຕ້ອງການໃຫ້ຂໍ້ມູນທີ່ເປັນຄວາມຈິງກ່ຽວກັບການເລືອກເຮັດສົງຄາມຂອງປະທານາທິບໍດີ ປູຕິນ.
ແລະ ນີ້ແມ່ນຄວາມຈິງພື້ນຖານ: ຣັດເຊຍ ແມ່ນກຳລັງດຳເນີນການໂຈມຕີທີ່ຕົນເອງໄດ້ຕຶກຕອງໄວ້ກ່ອນລ່ວງໜ້າແລ້ວ, ເປັນການໂຈມຕີທີ່ບໍ່ມີເຫດຜົນ ແລະ ບໍ່ຍຸດຕິທຳ ຕໍ່ອູແກຣນ, ເຊິ່ງເປັນການລະເມີດຕໍ່ກົດໝາຍລະຫວ່າງປະເທດ ແລະ ໄດ້ກໍ່ໃຫ້ເກີດວິກິດດ້ານສິດທິມະນຸດ ແລະ ມະນຸດສະທຳ.
ສົງຄາມທີ່ເກີດຂື້ນໃນ ອູແກຣນ ແມ່ນສົງຄາມທີ່ຣັດເຊຍໄດ້ເລືອກທີ່ຈະເຮັດ, ໂດຍໄດ້ປະຕິເສດຄວາມພະຍາຍາມໃນການເຈລະຈາທາງການທູດແບບສັນຕິວິທີ ຫລາຍຕໍ່ຫລາຍຄັ້ງ.
ທາງເລືອກໃນການເຮັດສົງຄາມຂອງປະທານາທິບໍດີ ປູຕິນ ໄດ້ບີບບັງຄັບໃຫ້ປະຊາຊົນອູແກຣນຈຳນວນຫລາຍລ້ານຄົນຕ້ອງໄດ້ປົບໜີ, ພົນລະເຮືອນຫລາຍພັນຄົນທີ່ບໍ່ມີຄວາມຜິດ, ລວມທັງເດັກນ້ອຍຈຳນວນຫລວງຫລາຍໄດ້ເສຍຊີວິດ ແລະ ຈຳນວນເພີ່ມຂື້ນໃນທຸກໆມື້ ທີ່ສົງຄາມນີ້ຍັງຄົງດຳເນີນຕໍ່ໄປ.
ຣັດເຊຍ ພາຍໃຕ້ການຊີ້ນຳຂອງປະທານາທິບໍດີ ປູຕິນ ວາລາດີເມຍ ຈະສ້າງເລື່ອງທີ່ບໍ່ມີມູນຄວາມຈິງ ອັນຈຳເປັນໃນທຸກຮູບແບບ ເພື່ອຫັນຄວາມສົນໃຈຈາກການເລືອກເຮັດສົງຄາມທີ່ລົ້ມເຫລວຂອງຕົນ.
ຂ້າພະເຈົ້າຂໍເນັ້ນໃຫ້ເຫັນເຖິງການອ້າງທີ່ບໍ່ມີມູນຄວາມຈິງ ໜຶ່ງຢ່າງ ໂດຍສະເພາະແມ່ນ: ການກ່າວຫາທີ່ບໍ່ຖືກຕ້ອງ ແລະ ບໍ່ມີມູນຄວາມຈິງ ຂອງສະຖານທູດຣັດເຊຍໃນອາທິດທີ່ຜ່ານມາ ກ່ຽວກັບຫ້ອງທົດລອງອາວຸດຊີວະພາບ ແລະ ອາວຸດເຄມີ ຂອງ ສະຫະລັດອາເມລິກາ ທີ່ໄດ້ທຳການພັດທະນາຢູ່ໃນອູແກຣນນັ້ນ, ແມ່ນການກ່າວຫາທີ່ບໍ່ມີຫລັກຖານອ້າງອີງ.
ຂໍ້ກ່າວຫາຂອງຣັດເຊຍແມ່ນເລື່ອງຫລອກຫລວງ.
ສະຫະລັດອາເມລິກາແມ່ນປະຕິບັດຕາມພັນທະຂອງຕົນຢ່າງຄົບຖ້ວນ ພາຍໃຕ້ສົນທິສັນຍາກ່ຽວກັບການຫ້າມອາວຸດຊີວະພາບ ແລະ ອາວຸດເຄມີ ແລະ ຍັງຕໍ່ຕ້ານການພັດທະນາ ລວມເຖິງ ການຄອບຄອງອາວຸດເຄມີ ຫລື ອາວຸດຊີວະພາບໃນທຸກໆບ່ອນ.
ເຊິ່ງຣັດເຊຍເອງ ເປັນຜູ້ທີ່ມີປະຫວັດອັນຍາວນານໃນການນຳໃຊ້ອາວຸດເຄມີ, ລວມເຖິງການລອບສັງຫານ ແລະ ການວາງສານພິດຕ່າງໆ. ແມ່ນປະເທດຣັດເຊຍ ທີ່ໄດ້ດຳເນີນໂຄງການອາວຸດຊີວະພາບ ມາເປັນເວລາດົນນານ ເຊິ່ງເປັນການລ່ວງລະເມີດຕໍ່ກົດໝາຍລະຫວ່າງປະເທດ.
ຣັດເຊຍຍັງມີປະຫວັດທີ່ຍາວນານ ໃນການກ່າວຫາຜູ້ອື່ນວ່າເປັນຜູ້ລ່ວງລະເມີດ ທັງໆທີ່ຣັດເຊຍເອງ ທີ່ເປັນຜູ້ກະທຳຄວາມຜິດ.
ດັ່ງທີ່ທ່ານໄດ້ເຫັນການເຕົ້າໂຮມກັນໃນມື້ນີ້ ຂອງບັນດາຜູ້ຕາງໜ້າຕ່າງໆ, ແລະ ຈາກຄະແນນສຽງລ່າສຸດຈາກສະຫະປະຊາຊາດ, ການຕອບໂຕ້ກັບສົງຄາມຣັດເຊຍ ແມ່ນເປັນອັນໜຶ່ງອັນດຽວກັນລະຫວ່າງບັນດາຜູ້ນຳຕ່າງໆຂອງໂລກ.
ໂລກແມ່ນກຳລັງຈັບຕາເບິ່ງວ່າ ປະເທດໃດທີ່ຈະຢືນຢັດເພື່ອຫລັກການພື້ນຖານຂອງອະທິປະໄຕ ແລະ ຜືນແຜ່ນດິນອັນຄົບຖ້ວນ, ແລະ ຜູ້ໃດທີ່ໃຫ້ການສະໜັບສະໜຸນ ຫລື ບໍ່ຕໍ່້ຕ້ານ ກັບການເລືອກເຮັດສົງຄາມຂອງປູຕິນ.
ແຜນການທາງການທະຫານຂອງປູຕິນ ທີ່ຈະຍຶດເອົາອູແກຣນໄດ້ຢ່າງໄວວານັ້ນໄດ້ລົ້ມເຫລວ. ເຊິ່ງໃນທີ່ສຸດ, ຣັດເຊຍຈະອ່ອນແອລົງ, ບໍ່ໄດ້ເຂັ້ມແຂງຂື້ນ, ສຳລັບການເປີດສົງຄາມນີ້.
ປະຊາຄົມສາກົນໂລກໄດ້ເຫັນພ້ອມເປັນສຽງດຽວກັນ ແລະ ໄດ້ໃຫ້ຄວາມສຳຄັນແກ່ບັນຫານີ້ຫລາຍກວ່າທີ່ເຄີຍໃນໄລຍະຜ່ານມາ. ພວກຂ້າພະເຈົ້າຍັງຄົງເປັນນໍ້າໜຶ່ງໃຈດຽວກັບປະເທດອູແກຣນ ກໍຄືປະຊາຊົນອູແກຣນ.
###
