ນະຄອນຫຼວງວຽງຈັນ, ວັນທີ 15 ເດືອນກໍລະກົດ ປີ 2021 – ມື້ນີ້, ສປປ ລາວ ໄດ້ຮັບການຈັດສົ່ງວັກຊີນກັນພະຍາດໂຄວິດ-19 ຄັ້ງໃໝ່ ຊຶ່ງແມ່ນການບໍລິຈາກຂອງສະຫະລັດອາເມລິກາ ໂດຍຜ່ານ COVAX Facility ຊຶ່ງແມ່ນການຮ່ວມມືກັນລະຫວ່າງອົງການພັນທະມິດຮ່ວມມືດ້ານນະວັດຕະກໍາເພື່ອຮັບມືກັບພະຍາດລະບາດ (CEPI), Gavi ຊຶ່ງເປັນພັນທະມິດວັກຊີນ, ແລະ ອົງການອະນາໄມໂລກ (WHO), ໂດຍມີອົງການຢູນິເຊັບເປັນຄູ່ຮ່ວມງານສຳຄັນໃນການຈັດສົ່ງ. ໃນນັ້ນປະກອບມີວັກຊີນ Johnson & Johnson/Janssen (J&J/Janssen) 1,008,000 ໂດສ໌. ອັນນີ້ແມ່ນສ່ວນໜຶ່ງຂອງການປະກອບສ່ວນຂອງສະຫະລັດອາ ເມລິກາຕໍ່ຄວາມພະຍາຍາມຂອງທົ່ວໂລກທີ່ພວມດຳເນີນການຢ່າງຕໍ່ເນື່ອງເພື່ອຢຸດຕິການລະບາດຂອງພະຍາດ ແລະ ເປັນການສະໜັບສະໜູນເປົ້າໝາຍຂອງສປປລາວທີ່ຈະສັກວັກຊີນກັນພະຍາດໃຫ້ໄດ້ 50% ຂອງປະຊາກອນໃນທ້າຍປີ 2021 ນີ້.
ພິທີມອບ ວັກຊິນ ໃນຄັ້ງນີ້ ເເມ່ນໄດ້ຖືກຈັດຂຶ້ນຢູ່ທີ່ ສະໜາມບິນສາກົນວັດໄຕ, ໂດຍມີ ພະນະທ່ານ ນາງ ປານີ ຢາທໍ່ຕູ້, ຮອງປະທານປະເທດ ແຫ່ງ ສປປ ລາວ, ໃຫ້ກຽດເປັນປະທານພິທີ ເເລະ ເຂົ້າຮ່ວມງານໂດຍ ພະນະທ່ານ ດຣ. ບຸນແຝງ ພູມມະໄລສິດ, ລັດຖະມົນຕີກະຊວງສາທາລະນະສຸກ, ພະນະທ່ານ ດຣ. ປີເຕີ ເຮມອນ, ເອກອັກຄະລັດຖະທູດສະຫະລັດອາເມລິກາປະຈຳ ສປປ ລາວ, ທ່ານ ດຣ. ກ້າວ ຈຸນ, ວ່າການແທນຜູ້ຕາງໜ້າອົງການອະນາໄມໂລກປະຈໍາ ສປປ ລາວ, ທ່ານນາງບີອາເຕ ດາສເຕລ໌, ວ່າການແທນຜູ້ຕາງໜ້າອົງການຢູນິເຊັບປະຈໍາ ສປປ ລາວ, ເເລະ ຜູ້ຕາງໜ້າຈາກພາກສ່ວນທີ່ກ່ຽວຂ້ອງອື່ນໆ.
ພະນະທ່ານ ນາງ ປານີ ຢາທໍ່ຕູ້, ຮອງປະທານປະເທດ ແຫ່ງ ສປປ ລາວ ກ່າວວ່າ: “ລັດຖະບານ ແຫ່ງ ສປປ ລາວ ຕີລາຄາສູງຕໍ່ການສືບຕໍ່ຊ່ວຍເຫຼືອຂອງ ລັດຖະບານ ແລະ ປະຊາຊົນສະຫະລັດອາເມລິກາ ເເກ່ ລັດຖະບານ ແລະ ປະຊາຊົນລາວ, ຊຶ່ງໃນຄັ້ງນີ້ ແມ່ນການຊ່ວຍເຫຼືອວັກຊີນປອັ້ງກັນພະຍາດໂຄວິດ-19 ອັນໄດ້ສະເເດງໃຫ້ເຫັນເຖິງສາຍພົວພັນທີ່ດີລະຫວ່າງສອງປະເທດຂອງພວກເຮົາ ພາຍໃຕ້ຄູ່ຮ່ວມມືແບບກວມລວມລະຫວ່າງ ສະຫະລັດອາເມລິກາ ເເລະ ສປປ ລາວ. ຂ້າພະເຈົ້າເຊື່ອໝັ້ນວ່າ ການໄດ້ຮັບວັກຊີນ ຈອນຊັນ ເເອນ ຈອນຊັນ ຂອງ ສປປ ລາວ ໃນຄັ້ງນີ້ ຈະຊ່ວຍເລັ່ງລັດການບັນລຸເປົ້າໝາຍການຊັກວັກຊີນໃຫ້ໄດ້ຢ່າງນ້ອຍ 50 ເປີເຊັນ ຂອງປະຊາຊົນລາວ ພາຍໃນທ້າຍປີ 2021 ນີ້.”
ຈາກການໄດ້ຮັບວັກຊີນຈຳນວນ 1,008,000 ໂດສ໌ ຊຶ່ງເປັນການບໍລິຈາກໂດຍກົງຈາກປະຊາຊົນອາເມລິກາໃຫ້ແກ່ ສປປ ລາວ, ຈະເຮັດໃຫ້ ລັດຖະບານລາວ ສາມາດຕອບສະໜອງການປ້ອງກັນການຕິດເຊື້ອໄວຣັດໃຫ້ແກ່ປະຊາຊົນ 1 ລ້ານກວ່າຄົນ ໃນຈຳນວນປະຊາກອນທັງໝົດປະມານ 7 ລ້ານຄົນ.
ວັກຊີນກັນພະຍາດໂຄວິດ-19 J&J/Janssen ແຕກຕ່າງຈາກວັກຊີນກັນພະຍາດໂຄວິດ-19 ຊະນິດອື່ນໆທີ່ມີຢູ່ໃນ ສປປ ລາວ ໃນປະຈຸບັນ ຍ້ອນວ່າຕ້ອງສັກພຽງຄັ້ງດຽວເທົ່ານັ້ນ. ນອກນັ້ນ, ວັກຊີນ J&J/Janssen ຍັງສາມາດເກັບຮັກສາໄວ້ໃນອຸນຫະພູມຕູ້ເຢັນປົກກະຕິ ຊຶ່ງເປັນທີ່ເໝາະສົມທີ່ສຸດຕໍ່ການສັກວັກຊີນກັນພະຍາດໃຫ້ແກ່ປະຊາກອນໃນເຂດຊົນນະບົດ ຫຼື ເຂດຫ່າງໄກສອກຫຼີກທີ່ເຂົ້າເຖິງຍາກ.
ພະນະທ່ານດຣ. ປີເຕີ ເຮມອນ, ເອກອັກຄະລັດຖະທູດສະຫະລັດອາເມລິກາປະຈຳ ສປປ ລາວ ກ່າວວ່າ: “ຂ້າພະເຈົ້າມີຄວາມພູມ ໃຈທີ່ໄດ້ຕາງໜ້າລັດຖະບານສະຫະລັດອາເມລິກາ ໃນການສະໜອງວັກຊີນເພື່ອຊ່ວຍຊີວິດເຫຼົ່ານີ້ໃຫ້ແກ່ປະຊາຊົນ ສປປ ລາວ. ການບໍລິຈາກໃນມື້ນີ້ຈະຮັບປະກັນວ່າປະຊາຊົນລາວຫຼາຍກວ່າ 1 ລ້ານຄົນຕື່ມອີກ – ປະມານ 14% ຂອງປະຊາກອນຂອງ ສປປ ລາວ – ຈະໄດ້ຮັບການສັກວັກຊີນກັນພະຍາດໂຄວິດ-19 ຢ່າງຄົບຖ້ວນ. ອັນນີ້ຈະເຮັດໃຫ້ ສປປ ລາວ ຫຍັບໃກ້ເຂົ້າເຖິງເປົ້າໝາຍການສັກວັກຊີນກັນພະຍາດໃຫ້ໄດ້ 50% ຂອງປະຊາກອນໃນທ້າຍປີ 2021 ນີ້, ແລະ ຈະເຮັດໃຫ້ທົ່ວໂລກຫຍັບໃກ້ເຂົ້າກັບການຢຸດຕິການແຜ່ລະບາດຂອງພະຍາດນີ້.”
ລັດຖະບານແຫ່ງສປປລາວຈະໃຊ້ວັກຊີນ J&J/Janssen ເຫຼົ່ານີ້ ຕໍ່ກຸ່ມທີ່ເປັນູລິມະສິດ, ລວມທັງຜູ້ທີ່ມີອາຍຸ 60 ປີຂື້ນໄປ, ຄົນທີ່ມີພະຍາດປະຈໍາຕົວ ແລະ ພະນັກງານສາທາລະນະສຸກໃນຂອບເຂດທົ່ວປະເທດ, ໂດຍສອດຄ່ອງກັບແຜນປະຕິບັດງານການສັກວັກຊີນກັນພະຍາດໂຄວິດ-19 ແຫ່ງຊາດ ແລະ ຍັງມີແຜນການເພີ່ມເຕີມເພື່ອນຳໃຊ້ຕໍ່ປະຊາກອນກຸ່ມເປົ້າໝາຍອື່ນໆ, ລວມທັງເຂດຫ່າງໄກ ສອກຫຼີກ ແລະ ເຂດທີ່ເຂົ້າເຖິງໄດ້ຍາກ.
ດຣ. ກາວຈູນ, ວ່າການແທນຜູ້ຕາງໜ້າ, ອົງການ WHO ປະຈໍາ ສປປ ລາວ ກ່າວວ່າ: “ການຮັບປະກັນການເຂົ້າເຖິງວັກຊີນ ແລະການສັກວັກຊີນແບບເທົ່າທຽມກັນໃຫ້ແກ່ຜູ້ທີ່ມີຄວາມສ່ຽງທີ່ສຸດໃນທົ່ວໂລກແມ່ນບູລິມະສິດຕົ້ນຕໍຂອງອົງການ WHO. ການສະໜັບສະໜູນຂອງສະຫະລັດອາເມລິກາໃນຄັ້ງນີ້ ແມ່ນທັນຕາມເວລາທີ່ຕ້ອງການທີ່ສຸດ ເພາະວ່າເປັນການມາເຖິງໃນເວລາທີ່ປະເທດກຳລັງຕ້ອງການຫຼາຍທີ່ສຸດ ແລະ ຈະຊ່ວຍໃຫ້ການສັກວັກຊີນໃຫ້ຜູ້ທີ່ມີຄວາມຕ້ອງການທີ່ສຸດໃນເຂດທີ່ເຂົ້າເຖິງໄດ້ຍາກ.”
ໃນກອງປະຊຸມສຸດຍອດ G7, ບັນດາສະມາຊິກໄດ້ໃຫ້ຄຳໝັ້ນສັນຍາວ່າຈະຊ່ວຍບັນດາປະເທດທີ່ມີລາຍໄດ້ຕໍ່າ ແລະ ລາຍໄດ້ປານກາງໃຫ້ເຂົ້າເຖິງການສັກວັກຊີນດ້ວຍການບໍລິຈາກວັກຊີນ. ພວກເຮົາຂໍຮຽກຮ້ອງໄປຍັງບັນດາປະເທດຜູ້ທີ່ສາມາດເຂົ້າເຖິງການສະໜອງວັກຊີນໄດ້ດີ ໃຫ້ປະຕິບັດຕາມຕົວຢ່າງຂອງລັດຖະບານສະຫະລັດ ອາເມລິກາ, ຂໍໃຫ້ບໍລິຈາກໂດຍໄວ ແລະ ຢ່າງຕໍ່ເນື່ອງໃນບັນດາເດືອນຕໍ່ໜ້ານີ້.
ທ່ານນາງບີອາເຕ ດາສເຕລ໌, ວ່າການແທນຜູ້ຕາງໜ້າອົງການຢູນິເຊັບປະຈໍາ ສປປ ລາວ ກ່າວວ່າ: “ອີງຕາມການຈັດຕັ້ງວຽກງານສັກຢາກັນພະຍາດໃຫ້ກັບເດັກໃນສິບປີທີ່ຜ່ານມາ ສາມາດເຫັນໄດ້ຢ່າງຊັດເຈນວ່າ ຢາວັກຊີນນັ້ນສາມາດຊ່ວຍຊີວິດໄດ້. ດັ່ງນັ້ນ, ຂ້າພະເຈົ້າຈຶ່ງຮູ້ສຶກມີຄວາມປິຕິຍິນດີທີ່ໄດ້ເຫັນຄວາມຄືບໜ້າຢ່າງສະໝໍ່າສະເໝີທີ່ພວກເຮົາໄດ້ຮ່ວມກັນ ເພື່ອສັກວັກຊີນກັນພະຍາດໃຫ້ແກ່ປະຊາຊົນລາວ. ຂ້າພະເຈົ້າຂໍສະເເດງຄວາມຂອບໃຈຕໍ່ສະຫະລັດອາເມລິກາ, ໂດຍສະເພາະ ສະຖານທູດສະຫະລັດອາເມລິກາປະຈຳ ສປປ ລາວ ແລະ ອົງການ USAID, ສຳລັບການປະກອບສ່ວນອັນໃຫຍ່ຫຼວງຂອງພວກເຂົາ. ການເຂົ້າເຖິງຢ່າງເທົ່າທຽມກັນໃນການສັກວັກຊິນກັນພະຍາດໂຄວິດ-19 ແມ່ນເສັ້ນທາງທີ່ຈະແຈ້ງທີ່ສຸດເພື່ອຫລຸດພົ້ນອອກຈາກການລະບາດຂອງພະຍາດນີ້ສຳລັບພວກເຮົາໝົດທຸກຄົນ, ລວມທັງເດັກ. ຍ້ອນວ່າໄວຣັດກາຍພັນພາໃຫ້ເກີດສາຍພັນໃໝ່, ຄວາມຕ້ອງການໃຫ້ຮ່ວມມືກັນເພື່ອເອົາຊະນະແມ່ນຈະຍິ່ງຫຍຸ້ງຍາກກວ່າເກົ່າ. ການບໍລິຈາກວັກຊີນແມ່ນນະໂຍບາຍທີ່ສະຫຼາດສະຫຼຽວ ເເລະ ສະແດງເຖິງຜົນປະໂຫຍດສູງສຸດແບບລວມໝູ່ຂອງພວກເຮົາ.”
ນອກຈາກການຈັດສົ່ງວັກຊີນ J&J/Janssen ຄັ້ງຫຼ້າສຸດນີ້ແລ້ວ, ກ່ອນໜ້ານີ້ ສປປ ລາວ ກໍໄດ້ຮັບການຈັດສົ່ງວັກຊີນກັນພະຍາດໂຄວິດ-19 Astra Zeneca/Oxford ຈຳນວນ 132.000 ໂດສ໌ ໃນຕົ້ນເດືອນມິນາ ປີ 2021, ພ້ອມທັງການຈັດສົ່ງວັກຊີນ Pfizer BioNTech ຈຳນວນ 100,620 ໂດສ໌ ໃນຕົ້ນເດືອນມິຖຸນາ ປີ 2021 ຊຶ່ງວັກຊີນທັງສອງຊະນິດນີ້ໄດ້ຮັບການຈັດຊື້ຜ່ານ COVAX Facility.
COVAX ແມ່ນການນຳພາຮ່ວມກັນ ໂດຍ Gavi ຊຶ່ງແມ່ນພັນທະມິດດ້ານວັກຊີນ, ອົງການ WHO ແລະ CEPI ທີ່ເຮັດວຽກຮ່ວມກັບອົງການຢູນິເຊັບ ພ້ອມທັງທະນາຄານໂລກ, ອົງການຈັດຕັ້ງສັງຄົມ, ຜູ້ຜະລິດ, ແລະອື່ນໆ. COVAX ແມ່ນສ່ວນໜຶ່ງຂອງແຜນງານການເຂົ້າເຖິງເຄື່ອງມືໂຄວິດ-19 (ACT) ຊຶ່ງແມ່ນການຮ່ວມມືທົ່ວໂລກຄັ້ງສໍາຄັນເພື່ອເລັ່ງລັດການພັດທະນາ, ການຜະລິດ ແລະ ການເຂົ້າເຖິງຢ່າງເທົ່າທຽມກັນຕໍ່ການກວດຫາ, ການປິ່ນປົວ ແລະ ການສັກວັກຊີນກັນພະຍາດ.
ສະມາຊິກສະພາບໍລິຫານງານຂອງ Gavi ທີ່ມີຕົວແທນໃນ ສປປ ລາວ ປະກອບມີອົດສະຕາລີ, ການາດາ, ຄະນະກຳມາທິການສະ ຫະພາບເອີຣົບ, ຝຣັ່ງ, ເຢຍລະມັນ, ຍີ່ປຸ່ນ, ສາທາລະນະລັດເກົາຫຼີ, ລັກແຊມເບີກ, ສະວິດເຊີແລນ, ຣາດຊະອານາຈັກອັງກິດ, ແລະ ສະຫະລັດອາເມລິກາ.