ນະຄອນຫຼວງວຽງຈັນ, ສປປ ລາວ – ຄະນະຜູ້ແທນຂັ້ນສູງແຫ່ງ ລັດຖະສະພາ ສ.ອາເມລິກາ ໄດ້ມາຢ້ຽມຢາມນະຄອນຫຼວງວຽງຈັນໃນວັນທີ 2-3 ເມສາ 2018 ແລະ ຍັງໄດ້ເຂົ້າພົບປະກັບຜູ້ຕາງໜ້າຈາກລັດຖະບານແຫ່ງ ສປປ ລາວ ໃນວັນອັງຄານທີ 3 ເມສາ 2018 ເພື່ອປຶກສາຫາລືແນວທາງໃນການເພີ່ມທະວີການຮ່ວມມືໃນຂົງເຂດປ້ອງກັນຊາດປ້ອງກັນຄວາມສະຫງົບ ແລະ ການບັງຄັບໃຊ້ກົດໝາຍ.
ທ່ານນາງ Jackie Speier ເປັນສະມາຊິກລັດຖະສະພາເພດຍິງ ເຊິ່ງເປັນຕົວແທນໃຫ້ແກ່ພັກເດໂມແຄັດ ຈາກລັດຄາລິຟໍເນັຍ, ລັດຖະສະພາເຂດ 14th. ທ່ານເປັນສະມາຊິກອາວຸໂສ ຂອງກຳມາທິການການທະຫານຂອງລັດຖະສະພາ ສ.ອາເມລິກາ ເຊິ່ງເປັນຜູ້ຮັບຜິດຊອບຫຼັກທາງດ້ານງົບປະມານ ແລະ ເບິ່ງແຍງໂດຍລວມວຽກງານກະຊວງປ້ອງກັນປະເທດ ຂອງ ສ.ອາເມລິກາ.
ໃນວັນທີ 3 ເມສາ 2018, ທ່ານຜູ້ແທນ Speier ໄດ້ເຂົ້າພົບປະກັບ ທ່ານ ສະເຫຼີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ເພື່ອໂອລົມຊອກຫາທາງໃນການເພີ່ມທະວີການຮ່ວມມືແບບກວມລວມ ລະຫວ່າງສະຫະລັດອາເມລິກາ ແລະ ສປປ ລາວ ເຊິ່ງໃນນີ້ລວມທັງຫົວຂໍ້ທີ່ກ່ຽວກັບບັນຫາ ສົງຄາມໃນອະດິດ ແລະ ການບັງຄັບໃຊ້ກົດໝາຍ. ທ່ານທັງສອງຍັງໄດ້ແລກປ່ຽນຄວາມຄິດຄຳເຫັນກ່ຽວກັບຄວາມໝັ້ນຄົງໃນຂົງເຂດພາກພື້ນ ແລະ ລະດັບສາກົນ. ນອກຈາກນີ້, ທ່ານຜູ້ແທນ Speier ຍັງໄດ້ຮັບຮູ້ເຖິງຄວາມຄືບໜ້າຂອງການຮ່ວມມືທັງສອງຝ່າຍໃນການສົ່ງເສີມ ແລະ ພັດທະນາ ລັດແຫ່ງກົດໝາຍ, ການຕ້ານການສໍ້ລາດບັງຫຼວງໃນ ສປປ ລາວ ພ້ອມທັງສະແດງການຮ່ວມມື ເພື່ອຊ່ວຍ ສປປ ລາວ ບັນລຸເປົ້າໝາຍການພັດທະນາແບບຍືນຍົງ ເພື່ອຊ່ວຍໃຫ້ຊີວິດຂອງປະຊາຊົນລາວມີຄວາມປອດໄພ ແລະ ເພື່ອຊ່ວຍຫຼຸດຜ່ອນບັນຫາລະເບີດບໍ່ທັນແຕກເຊິ່ງເປັນໜຶ່ງໃນອຸປະສັກຂອງການພັດທະນາແຫ່ງຊາດກ່ອນປີ 2030.
ນອກຈາກການປະຊຸມທາງການແລ້ວ, ທ່ານຜູ້ແທນ Speier ກໍຍັງໄດ້ມີໂອກາດໄດ້ສຳພັດກັບວັດທະນະທຳອັນສຳຄັນຂອງປະຊາຊົນລາວບັນດາເຜົ່າ ເຊິ່ງທ່ານໄດ້ເຂົ້າຢ້ຽມຊົມ ວັດສີສະເກດ, ຮຽນຮູ້ກ່ຽວກັບການຕໍ່າແຜ່ນແພພື້ນເມືອງຂອງ ສປປ ລາວ ແລະ ຮ່ວມໃສ່ບາດທີ່ວັດສີເມືອງ. ກິດຈະກຳດັ່ງກ່າວໄດ້ສະແດງໃຫ້ເຫັນເຖິງຄວາມສຳພັນແໜ້ນແຟ້ນທາງດ້ານສັງຄົມ ແລະ ວັດທະນະທຳ ລະຫວ່າງປະຊາຊົນຂອງທັງສອງປະເທດ. ສິ່ງດັ່ງກ່າວຍັງສາມາດເພີ່ມທະວີຄວາມສຳພັນອັນໃກ້ຊິດ ແລະ ເຊື່ອມຕໍ່ສາຍພົວພັນອັນສຳຄັນລະຫວ່າງລັດຖະບານຂອງທັງສອງປະເທດອີກດ້ວຍ.
ທ່ານອຸປະທູດ ໄມໂຄ ຄລາຍ ໄດ້ກ່າວວ່າ: ນີ້ເປັນຄັ້ງທີ່ສາມທີ່ບັນດາຜູ້ນຳລະດັບສູງຂອງ ສະຫະລັດອາເມລິກາ ໄດ້ມາຢ້ຽມຢາມ ສປປ ລາວ ໃນປີນີ້. ການຢ້ຽມຢາມໃນຄັ້ງນີ້ໄດ້ສະແດງໃຫ້ເຫັນເຖິງຄວາມມຸ່ງໝັ້ນໃນການສະໜັບສະໜຸນການຮ່ວມມືແບບກວມລວມລະຫວ່າງ ສະຫະລັດອາເມລິກາ ແລະ ສປປ ລາວ ແລະ ຄວາມໝາຍໝັ້ນໃນການຮັດແໜ້ນສາຍພົວພັນລະຫວ່າງສອງຊາດ.
