ນະຄອນຫຼວງວຽງຈັນ, ສປປ ລາວ – –ທ່ານ ນາງ ຣີນາ ບິດເຕີ, ເອກອັກຄະລັດຖະທູດສະຫະລັດປະຈຳ ສປປ ລາວ ໄດ້ກ່າວເປີດງານ Lao Digital Forum ຄັ້ງທໍາອິດ ທີ່ຈັດຂຶ້ນໃນວັນທີ 26 ມັງກອນ ທີ່ນະຄອນຫຼວງວຽງຈັນ. ງານງດັ່ງກ່າວແມ່ນສຸມໃສ່ເສດຖະກິດດິຈິຕໍລະດັບສາກົນ ແລະ ຜົນປະໂຫຍດຕ່າງໆ ທີ່ມີຕໍ່ກັບວິສາຫະກິດຈຸລະພາກ ແລະ ວິສາຫະກິດຂະໜາດນ້ອຍ ແລະ ຂະໜາດກາງ ຢູ່ ສປປ ລາວ ລວມທັງສະພາບແວດລ້ອມດ້ານນະໂຍບາຍ ທີ່ຈຳເປັນເພື່ອເກັບກ່ຽວຜົນປະໂຫຍດຈາກເສດຖະກິດດິຈິຕໍ.
ບັນດາຜູ້ປະກອບການໄວໜຸ່ມ ແລະ ບັນດາອະດິດນັກສຶກສາ ຈາກ ສະຖານທູດອາເມລິກາ ໂດຍຮ່ວມມືກັບ ສະມາຄົມເຕັກໂນໂລຊີການສື່ສານ ແລະ ຂໍ້ມູນຂ່າວສານ, ສະພາການຄ້າ ແລະ ອຸດສາຫະກຳແຫ່ງຊາດລາວ (LNCCI), ກະຊວງວິທະຍາສາດ ແລະ ເຕັກໂນໂລຊີ (MOST) ແລະ ກະຊວງໄປສະນີ ແລະ ໂທລະຄົມມະນາຄົມ (MOPT) ຈັດງານຄັ້ງນີ້ຂື້ນ. ອົງການພັດທະນາສາກົນແຫ່ງ ສະຫະລັດອາເມລິກາ (USAID) ໄດ້ສະໜັບສະໜູນງານສະແດງຄັ້ງນີ້ ໂດຍຜ່ານ ໂຄງການ ລາວ-ອາເມລິກາ ເພື່ອຊ່ວຍເຫຼືອດ້ານການເຊື່ອມໂຍງເຂົ້າອາຊຽນ ແລະ ສາກົນ (LUNA), ບັນດາບໍລິສັດອາເມລິກາ ເຊັ່ນ: Microsoft, Visa, ແລະ Facebook ແມ່ນໜຶ່ງໃນຈຳນວນຜູ້ສະໜັບສະໜູນງານໃນຄັ້ງນີ້.
ທ່ານ ທູດ ຣີນາ ກ່າວວ່າ: “ຂ້າພະເຈົ້າຄາດຫວັງວ່າໃນອານາຄົດຂ້າພະເຈົ້າຈະສາມາດຈັບໂທລະສັບສະມາດໂຟນຂຶ້ນມາ ແລ້ວສັ່ງຊື້ກາເຟຈາກ ພູພຽງບໍລະເວນ, ຜ້າໄໝຈາກແຂວງຫົວພັນ ແລະ ເຂົ້າໜຽວຈາກແຂວງຊຽງຂວາງ ໂດຍຈ່າຍຜ່ານລະບົບອອນລາຍ ແລະ ເຄື່ອງຂົນສົ່ງມາຮອດເຮືອນຢູ່ນະຄອນຫຼວງວຽງຈັນ. ນັ້ນແມ່ນພະລັງຂອງເສດຖະກິດດິຈິຕໍ ແລະ ວິໄສທັດຂອງຂ້າພະເຈົ້າທີ່ມີຕໍ່ອານາຄົດດັ່ງກ່າວແມ່ນບໍ່ຢູ່ໄກເກີນເອື້ອມ.”
ທ່ານ ແກ້ວນາຄອນ ໄຊສຸລຽນ, ຫົວໜ້າກົມເຕັກໂນໂລຊີດີຈິຕໍ ຈາກ ກະຊວງວິທະຍາສາດ ແລະ ເຕັກໂນໂລຊີ ລາຍງານກ່ຽວກັບສະພາບເຕັກໂນໂລຊີດີຈິຕໍ ຢູ່ ສປປ ລາວ ໃນປະຈຸບັນ ແລະ ທ່ານ ພູໂຂງ ຈິດຮູບໂລກ, ຫົວໜ້າກົມແຜນການ ແລະ ການຮ່ວມມື, ນໍາສະເໜີກ່ຽວກັບນະໂຍບາຍ ແລະ ລະບຽບການຕ່າງໆ ກ່ຽວກັບການນຳໃຊ້ ແລະ ສົ່ງເສີມ ເຕັກໂນໂລຊີການສື່ສານ ແລະ ຂໍ້ມູນຂ່າວສານ (ICT) ຢູ່ ສປປ ລາວ ແລະ
ທ່ານ Huy Nguyen Tuong, ຜູ້ນຳພາກພື້ນຮັບຜິດຊອບການຂະຫຍາຍການຮ່ວມມື ຂອງ Facebook ນຳສະເໜີ ໂຄງການລິເລີ່ມຂອງ Facebook ຫົວຂໍ້ “Free Basics in Laos,”ເຊິ່ງແມ່ນໂຄງການທີ່ສະໜີ ການເຂົ້າເຖິງການບໍລິການອິນເຕີເນັດ ແລະ Facebook ບໍ່ເສຍຄ່າໃຊ້ຈ່າຍ ຢູ່ ສປປ ລາວ.
ອາຊຽນ ແມ່ນພາກພື້ນທີ່ເຕີບໂຕໄວທີ່ສຸດໃນໂລກ ດ້ານການນຳໃຊ້ອິນເຕີເນັດ, ໂດຍຫຼັກໆແມ່ນເນື່ອງຈາກການນຳໃຊ້ໂທລະສັບມືຖືທີ່ເພີ່ມຂຶ້ນ. ໃນໄລຍະລະຫວ່າງ 2006 ເຖິງ 2015, ຈຳນວນຜູ້ໃຊ້ໂທລະສັບມືຖື ໃນອາຊຽນ ເພີ່ມຂຶ້ນຈາກ 198 ລ້ານຄົນ ເປັນ 784 ລ້ານຄົນ. ການເຕີບໂຕດ້ານເສດຖະກິດຂອງອາຊຽນ ແລະ ປະຊາກອນໄວໜຸ່ມທີ່ມີຈຳນວນຫຼາຍ ໝາຍຄວາມວ່າ ພາກພື້ນນີ້ ຢູ່ໃນຕຳແໜ່ງທີ່ດີ ທີ່ຈະໄດ້ຮັບຜົນປະໂຫຍດຈາກເສດຖະກິດດິຈິຕໍ.
