ຮອງຜູ້ຊ່ວຍລັດຖະມົນຕີກະຊວງການຕ່າງປະເທດສະຫະລັດອາເມລິກາ ຮັບຜິດຊອບວຽກງານຂົງເຂດອາຊີຕະເວັນອອກສຽງໃຕ້ ທ່ານ ແພັດທຼິກ ເມີຟີ ໄດ້ເດີນທາງມາຢ້ຽມຢາມ ສປປ ລາວ ລະຫວ່າງວັນທີ 16 ແລະ 17 ເດືອນມັງກອນ ທີ່ຜ່ານມາ. ທ່ານ ເມີຟີ ໄດ້ກ່າວກ່ຽວກັບສາຍພົວພັນລະຫວ່າງ ສປປ ລາວ ແລະ ສະຫະລັດອາເມລິກາ ວ່າ “ການຮ່ວມມືຂອງພວກເຮົາໃນອານາຄົດມີຄວາມສົດໃສເພາະພວກເຮົາເຮັດວຽກຮ່ວມກັນເພື່ອເຮັດໃຫ້ສັນຍາຄູ່ຮ່ວມມືແບບກວມລວມປະກົດຜົນເປັນຈິງ.”
ທ່ານໄດ້ສະເໜີໂດຍສັງເຂບຫຼາຍຂົງເຂດສຳຄັນ ທີ່ ສະຫະລັດອາເມລິກາ ແລະ ສປປ ລາວ ສາມາດເສີມຂະຫຍາຍການຮ່ວມມື ເຊິ່ງລວມທັງ ການເພີ່ມທະວີການເກັບກູ້ລະເບີດບໍ່ທັນແຕກ (UXO), ການລົງທຶນໃສ່ການພັດທະນາຊັບພະຍາກອນມະນຸດ ແລະ ສະຖາບັນ, ແລະ ຂະຫຍາຍການຮ່ວມມືເສດຖະກິດ ແລະ ການພົວພັນຂອງປະຊາຊົນດ້ວຍກັນ.
ໃນໄລຍະທີ່ຢູ່ນະຄອນຫຼວງວຽງຈັນ, ທ່ານຮອງຜູ້ຊ່ວຍລັດຖະມົນຕີ ເມີຟີ ໄດ້ພົບກັບ ລັດຖະມົນຕີຊ່ວຍວ່າການ ກະຊວງການຕ່າງປະເທດ ທ່ານ ແສງເພັດ ຮຸ່ງບຸນຍວງ ເພື່ອປຶກສາຫາລືສືບຕໍ່ພັດທະນາສັນຍາຄູ່ຮ່ວມມືແບບກວມລວມ ແລະ ໄດ້ພົບກັບ ລັດຖະມົນຕີຊ່ວຍວ່າການ ກະຊວງອຸດສາຫະກຳ ແລະ ການຄ້າ ທ່ານ ສົມຈິດ ອິນທະມິດ ເພື່ອປຶກສາຫາລືກ່ຽວກັບ ການຮ່ວມມືເສດຖະກິດທີ່ຂະຫຍາຍຕົວເພີ່ມຂຶ້ນ ລະຫວ່າງສະຫະລັດອາເມລິກາ ແລະ ສປປ ລາວ. ທ່ານຍັງໄດ້ພົບກັບ ຮອງລັດຖະມົນຕີວ່າການກະຊວງສາທາລະນະສຸກ ທ່ານ ດຣ. ພູທອນ ເມືອງປາກ ເພື່ອປຶກສາຫາລືກ່ຽວກັບການ ຮ່ວມມືໃນຂະແໜງສາທາລະນະສຸກ ເຊິ່ງລວມທັງ ສະຖາບັນໂພຊະນາການ ລາວ-ອາເມລິກາ (LANI).
ໃນການເດີນທາງໄປຢ້ຽມຢາມແຂວງຊຽງຂວາງ, ທ່ານຮອງຜູ້ຊ່ວຍລັດຖະມົນຕີ ເມີຟີ ໄດ້ເຫັນການປະຕິບັດງານເກັບກູ້ UXO ຕົວຈິງ ໂດຍທີມເກັບກູ້ UXO ຂອງລາວທີ່ໄດ້ຮັບທຶນຊ່ວຍເຫຼືອຈາກສະຫະລັດ. ໃນການເດີນທາງມາຢ້ຽມຢາມນະຄອນຫຼວງວຽງຈັນ ເດືອນກັນຍາທີ່ຜ່ານມາ, ທ່ານປະທານາຖິບໍດີ ໂອບາມາ ໄດ້ປະກາດເພີ່ມການຊ່ວຍເຫຼືອໃຫ້ຂະແໜງ UXO ເປັນຈຳນວນເງິນ 90 ລ້ານໂດລາໃນໄລຍະສາມປີ.
ຮອງຜູ້ຊ່ວຍລັດຖະມົນຕີກະຊວງການຕ່າງປະເທດສະຫະລັດອາເມລິກາ ຮັບຜິດຊອບວຽກງານກ່ຽວກັບອາຊີຕະເວັນອອກສຽງໃຕ້ ທ່ານ ແພັດທຼິກ ເມີຟີ ແມ່ນນັກການທູດ ເຊິ່ງກ່ອນໜ້ານີ້ເຄີຍດຳລົງຕຳແໜ່ງເປັນຮອງເອກອັກຄະລັດຖະທູດປະຈຳປະເທດໄທ (2013-2016) ແລະ ເລໂຊໂທ (2006-2008). ທ່ານຍັງເຄີຍເຮັດໜ້າທີ່ເປັນທູດພິເສດປະຈຳປະເທດມຽນມ້າ, ຫົວໜ້າສຳນັກງານແຜ່ນດິນໃຫຍ່ອາຊີຕະເວັນອອກສຽງໃຕ້ (the Office for Mainland Southeast Asia) ແລະ ເຈົ້າໜ້າທີ່ໂຕະຮັບຜິດຊອບປະເທດລາວ ແລະ ປະເທດມຽນມ້າ.
